کیسٹر آئل جسے عرف عام میں ارنڈ کا تیل بھی کہا جاتا ہے، عرصہ دراز سے طبی مقاصد اور ادویات وغیرہ میں استعمال کیا جا رہا ہے۔ اس کے علاوہ چکناہٹ اور لزوجیت (گاڑھی قسم کی چپچپاہٹ) جیسی خصوصیات کی وجہ سے اسے صنعتی مقاصد کے لیے بھی استعمال کیا جاتا ہے۔ بات یہاں پر ہی ختم نہیں ہوتی بلکہ ارنڈ کے تیل کے دیگر بے پناہ عام اور روزمرہ استعمالات اتنے زیادہ ہیں کہ یہ اب ہر گھر کی ضرورت بن چکا ہے۔
آئیے دیکھتے ہیں کہ کیسٹر آئل کے دس بہترین اور روزمرہ استعمالات کون سے ہیں۔
ارنڈ کا تیل ایک گرم خصوصیات والا تیل ہے۔ یہ جسم میں مائعات کے بہاؤ کو بہتر بنانے میں مدد دیتا ہے۔ اسے مساج کے لیے بھی استعمال کیا جا سکتا ہے۔ اگر زیادہ کام کاج اور دن بھر کی دوڑ دھوپ کے بعد اپنے کے پٹھوں میں کھچاؤ اور درد کی سی کیفیت پیدا ہو جاتی ہے تو اس تیل کے استعمال سے پٹھوں کو سکون اور درد سے آرام ملتا ہے۔
طریقہ استعمال یہ ہے کہ تھوڑا سا تیل متاثرہ پٹھے پر لگائیں۔ اور ہلکی ہلکی مالش کریں تا کہ تیل میں جذب ہو جائے۔ بہتر نتائج کے لیے آپ ایک چمچ ارنڈ کے تیل میں پودینے اور بابونہ (کیمومائل) کے تیل کی کچھ مقدار ملا کر استعمال کریں۔ درد سے فوری افاقہ ہو گا۔
اس جادوئی تیل کی سر میں مالش کرنے سے بالوں کی بڑھوتری میں حیران کن اضافہ ہوتا ہے۔ اس کے لیے آپ ارنڈ کے تیل کو ہلکا سا گرم کریں اور پھر انگلیوں کی پوروں پر لگا کر سر میں مالش کریں۔ ہفتہ میں کم از کم دو یا تین بار رات کو ایسا کر کے سو جائیں اور صبح اٹھ کر بال دھو لیں۔ باقاعدگی سے ایسا کرتے رہنے سے چند ہفتوں کے اندر ہی نتائج آنا شروع ہو جائیں گے۔
اگر آپ اپنے ابرو یعنی بھنووں کی افزائش سے مطمئن نہیں ہیں تو ہر روز رات کے وقت روئی کی مدد سے ارنڈ کے تیل کی ہلکی سی مقدار دونوں ابرو پر لگا کر سو جائیں۔ جلد ہی آپ محسوس کریں گے کہ آپ کی آبرو گہری اور گھنی ہو گئیں ہیں۔
ارنڈ کے تیل میں پھپھوندی کی وجہ سے پیدا ہونے والے انفیکشن مثلاً ایتھلیٹ فٹ، رنگ ورم، پاؤں میں سوجن وغیرہ کا مقابلہ کرنے کی بھی صلاحیت ہے۔ اس میں فنگس کا علاج کرنے والی دواؤں جیسی خاصیت موجود ہے۔ نیز اس کے ضمنی مضر اثرات بھی نہیں ہوتے۔ اس لیے ارنڈ کا تیل یعنی کیسٹر آئل فنگس انفیکشن کو بہترین علاج ہے۔
اس کے لیے آپ تیل کو پہلے گرم کریں۔ پھر اتنا ٹھنڈا کریں کہ اسے آسانی سے ہاتھ لگایا جا سکے۔ اس کے بعد اسے متاثرہ جگہ پر لگا کر رات بھر کے لیے کھلا چھوڑ دیں۔ چند ہفتوں کے استعمال سے ہی آپ واضح فرق محسوس کریں گے۔
کیسٹر آئل بالوں کے قدرتی رنگ کی چمک اور شان کو بڑھاتا ہے۔ چونکہ اس میں مرطوب کرنے کی صلاحیت ہے اس لیے بالوں پر لگانے سے ان کی مرطوبیت اور چمک میں اضافہ کرتا ہے جس کے بعد ہر بال علحیدہ اور چمکدار نظر آتا ہے۔ اس کے لیے آپ پہلے بالوں کو گیلا کریں۔ اور پھر تھوڑے سے تیل کی مالش کر لینے کے بعد رات بھر کے لیے چھوڑ دیں۔ صبح اٹھتے ہی بالوں کو دھو لیں۔ آپ جلد ہی واضح فرق محسوس کریں گے اور آپ کے بالوں کا قدرتی رنگ پھر سے لوٹ آئے گا۔
اگر آپ کی جلد خشک ہے تو کیسٹر آئل آپ کا بہترین معاون ثابت ہو سکتا ہے۔ چونکہ اس میں لزوجیت زیادہ ہوتی ہے اس لیے یہ بافتوں کی گہرائی میں جا کر اثر کرتا ہے اور فیٹی ایسڈ کی مقدار بہم پہنچاتا ہے۔ اس کے لیے آپ تیل کو دونوں ہتھیلیوں پر لگا کر پورے جسم پر مل لیں۔ آسانی کے لیے آپ اس میں گری کے تیل کو بھی ساتھ ملا سکتے ہیں۔
اچھی اور مناسب نیند ایک صحت مند زندگی کے لیے انتہائی ضروری ہے۔ لیکن اگر آپ نیند کی کمی یا بے خوابی جیسے مسائل کا شکار ہیں تو ادویات کے استعمال سے پہلے ایک بار کیسٹر آئل کو آزما کر دیکھیں۔ اکثر لوگوں نے اسے آنکھوں کے گرد، کنپٹیوں اور سر پر لگا کر دیکھا ہے اور حیران کن نتائج پائے ہیں۔ اس لیے آپ بھی اس تیل کا سر میں مساج کریں یا پھر تھوڑی سی مقدار پپوٹوں اور کنپٹیوں پر لگائیں۔ اور پرسکون نیند کا لطف اٹھائیں۔
ارنڈ کے تیل یعنی کیسٹر آئل کی مدد سے آپ جلد پر پیدا ہونے والے داغ، نشان اور کیل وغیرہ کو بھی باآسانی ختم کر سکتے ہیں۔ پس اگر کبھی ایسے نشانات پیدا ہوں تو روئی کو کیسٹر آئل میں تر کر کے متعلقہ جگہ پر لگائیں۔ اور پھر کچھ گھنٹوں کے لیے کھلا چھوڑنے کے بعد دھو لیں۔ بہتر نتائج کے لیے رات بھر کے لیے لگائیں۔
اینٹی فنگس خصوصیات کی بناء پر کیسٹر آئل فوڈ انڈسٹری میں بھی کافی اہمیت اختیار کر چکا ہے۔ کئی اجناس اور خشک میووں کو لمبے عرصے تک محفوظ رکھنے کے لیے اس تیل کا استعمال کیا جاتا ہے۔ اگر آپ بھی کسی ایمرجنسی یا مشکل وقت کے خشک اجناس کو محفوظ کرنا چاہتے ہیں لیکن کیمیکل مادوں کا استعمال نہیں کرنا چاہتے تو اس مقصد کے لیے کیسٹر آئل ایک بہترین متبادل ہے۔
صرف تین اجزاء۔۔۔ یعنی چارکول پاؤڈر، چھتے کی موم، اور کیسٹر آئل کو ملا کر آپ گھر میں ہی بہترین مسکارا بنا سکتے ہیں۔ اس کے لیے پہلے آپ ایک چمچ موم کو بوائل میں گرم کر کے پگھلائیں۔ جب یہ موم اچھی طرح پگھل جائے تو دو چمچ کیسٹر آئل مکس کریں۔ اس کے بعد چارکول پاؤڈر یا پھر کوکوا پاؤڈر (اگر آپ بھورے رنگ کا کاجل تیار کرنا چاہتی ہیں) ملائیں۔ اس کے بعد ان تینوں کو اچھی طرح مکس کریں۔ لیجیے بہترین کاجل گھر پر ہی تیار ہے
گھروں میں موجود پالتو کتے یا بلیاں عام طور پر اپنے چھوٹے موٹے زخموں کو زبان سے چاٹتے رہتے ہیں۔ اس سے انفیکشن کے مزید بڑھنے کا خدشہ پیدا ہو جاتا ہے۔ لہزا اس عمل کو بروقت روکنا ضروری ہوتا ہے۔ اس مقصد کے لیے آپ کیسٹر آئل کی تھوڑی سی مقدار متاثرہ جگہ پر لگا دیں۔ اول تو آپ کا پالتو جانور بو کی وجہ سے ہی زبان نہیں لگائے گا۔ اگر ایسا کیا بھی تو اس کے نقصانات انتہائی کم ہوں گے۔ لیکن بہتر یہ ہے کہ اس ترکیب کو استعمال کرنے سے پہلے آپ جانوروں کے ڈاکٹر سے مشورہ کر لیں۔
درجہ بالا دس نکات آپ کو کیسٹر آئل کی جانب راغب کرنے کے لیے کافی ہیں۔ اگر آپ نے پہلے ہی اس تیل کی بوتل خرید رکھی ہے تو اب آپ پہلے سے بہتر اس کے استعمالات جانتے ہیں۔