ویب ڈیسک
قدرت کے عطاء کردہ فطری عجائبات میں سے ایک آبشار، فطرت کا ایک ایسا حسین نمونہ ہے جس کی خوبصورتی سحر انگیز ہے۔ بلندیوں سے پستیوں میں گرتا سنگ مرمر جیسا سفید دودھیا پانی دیکھنے والوں کو اپنے سحر میں جکڑ لیتا ہے۔
دنیا کی بڑی آبشاروں پر جانے والے افراد ان کی خوبصورتی کو پھر کبھی بھلا نہیں پاتے۔ دنیا بھر میں ایسی سینکڑوں خوبصورت آبشاریں موجود ہیں۔ اس مضمون میں ہم آپ کو دنیا کی دس بڑی آبشاروں سے روشناس کروائیں گے۔
دنیا کی دس بڑی آبشاریں درج ذیل ہیں۔
دریائے شروتی پر موجود جوگ آبشار، 253 میٹر (829 فٹ) بلند ہے۔ یہ بھارت کی دوسری بڑی آبشار ہے۔ بھارتی ریاست کرناٹک کے علاقے سگارا میں موجود یہ آبشار کئی حصوں میں منقسم ہے اور سیاحوں کے لیے بڑی دلچسپی کا باعث ہے۔
انہیں گیروپا اور جوگاڈاکنڈی کے ناموں سے بھی پکارا جاتا ہے۔ موسم گرما سے پہلے یہ آبشار تقریباً ناہونے کے برابر دکھائی دیتی ہے۔ صرف ایک یا دو جگہوں سے پانی دھار کی صورت ٹپ ٹپ بہتا ہے۔ لیکن مون سون کا آغاز ہوتے ہی یہ سوئی ہوئی آبشار جیسے جاگ جاتی ہے۔ اور بلندی و حجم کے اعتبار سے گیانا کی کیٹئیر آبشار سے بھی بڑھ جاتی ہے۔
گل فوس کا مطلب ہے “سنہری آبشار”۔ یہ آبشار آئیس لینڈ کی سب سے بڑی اور بلاشبہ سب سے مشہور آبشار ہے۔ 32 میٹر بلند یہ دہری آبشار سفید پانیوں کے دریا ہوئیتا پر موجود ہے۔ موسم گرما کے دوران گلیشئیر پگھلنے اور پانی کے بہاؤ میں اضافہ ہونے کی وجہ سے یہ آبشار حجم کے اعتبار سے یورپ کی سب سے بڑی آبشار کا درجہ اختیار کر جاتی ہے۔
ڈیٹیاں آبشار دراصل دو آبشاروں پر مشتمل ہے۔ جو چین اور ویت نام کی سرحد پر بہنے والے دریائے گیچوآن پر واقع ہیں۔ ویت نام کے صوبہ کاؤ بینگ میں موجود یہ آبشاریں ہنوئی سے 272 کلومیٹر کے فاصلے پر ہیں۔ یہ دو سرحدوں کو پار کرنے والی دنیا کی چوتھی بڑی آبشار ہے۔
چین اور ویت نام کے درمیان مختلف سرحدی تنازعات کے باعث اس آبشار تک رسائی انتہائی مشکل تھی۔ البتہ حال ہی میں سیاحوں کو بھی اس تک رسائی حاصل کرنے کی اجازت دی گئی ہے۔ 30 میٹر بلند یہ آبشار چٹانوں اور درختوں سے ٹکراتی تین حصوں میں منقسم ہو جاتی ہے۔ اس کے پانیوں کے شور اور گونجدار آواز کو دور دور تک سنا جا سکتا ہے۔
یہ آبشار ایتھوپیا کے بلیو نیل دریا پر واقع ہے۔ اسے دھواں اڑاتے پانیوں والی آبشار بھی کہا جاتا ہے۔ باہردیر نامی قصبے اور جھیل تانا سے 30 کلومیٹر نیچے موجود اس آبشار کا زیادہ تر پانی اب ایک ڈیم کی جانب موڑ دیا گیا ہے۔ تاہم اس کے باوجود یہ ایتھوپیا کے بہترین تفریحی مقامات میں سے ایک ہے۔
وینوفوسن آبشار یورپ کی سب سے بڑی اور دنیا کی چھٹی لمبی ترین آبشار ہے۔ یہ ناروے کی رومسڈال کاؤنٹی کے قصبے سنڈل سورا کے مشرق میں واقع ہے۔ یہ دریائے وینو کا حصہ ہے۔ جو کہ وینوفلٹ پہاڑ سے بہتا ہے۔ یہ آبشار وینو گلیشئر کے پانیوں کو لے کر ہولزلینڈ کے قریب دریائے دریوا میں جا گرتی ہے۔
کیٹئر ایک بڑے حجم کی آبشار ہے جو کہ وسطی گیانا کے دریائے پٹارو پر پر موجود ہے۔ یہ کیٹئر نیشنل پارک کا ایک حصہ ہے۔ یہ دنیا کی طاقتور ترین آبشاروں میں سے ایک ہے۔ اس پر اوسطاً 23 ہزار 400 کیوبک فیٹ پانی گزرتا ہے۔ یہ نیاگراسے پانچ گنا اونچی اور وکٹوریا سے دوگنی اونچائی کی حامل آبشار ہے۔ گو کہ اس سے زائد اونچی آبشاریں بھی موجود ہیں لیکن یہ آبشار اونچائی اور حجم کے مجموعی اعتبار سے دنیا کی ایک بڑی آبشار ہے۔
اینجل فال دنیا کی سب سے اونچی آبشار ہے جو کہ بغیر رکاوٹ کے بہتی ہے۔ 979 میٹر اونچائی اور 807 میٹر چوڑائی میں بہتی یہ آبشار اتنی دیوقامت ہے کہ اس کے پانی زمین پر گرنے سے پہلے مکمل طور پر بخارات میں تبدیل ہو جاتے ہیں۔ پانی زمین پر گرتا نظر نہیں آتا۔
نیاگرا فال دنیا کی مشہور ترین آبشاروں میں سے ایک ہے۔ یہ بنیادی طور پر تین مختلف آبشاروں کا مجموعہ ہے جن کے نام امریکن فال، برائڈل ویل فال، اور ہارس شو فال ہیں۔ یہ آبشار کینیڈا کے صوبے اونٹاریو اور امریکی ریاست نیویارک کے درمیان سرحد کا کام دیتی ہے۔ ان تینوں میں سے ہارس شو کینیڈا میں جبکہ باقی دو نیویارک میں واقع ہیں۔ اس آبشار کو دیکھنے سالانہ 14 ملین سے زائد سیاح آتے ہیں۔ یوں مقبولیت کے اعتبار یہ دنیا کی سب سے زیادہ دیکھی جانے والی آبشار ہے۔
وکٹوریا فال کے متعلق کہا جاتا ہے کہ “یہ ایک ایسا دھواں جو کہ گرجتا ہے”۔ یہ آبشار افریقہ کے دریائے زمبیری پر واقع ہے جو کہ زمبابوے اور زیمبیا کی سرحد کنارے بہتا ہے۔ وکٹوریا فال کو عام طور پر دنیا کی سب سے بڑی آبشار بھی کہا جاتا ہے۔ یہ اعزاز لمبائی چوڑائی کو مشترکہ طور پر ملانے کی وجہ سے ہے۔ اس کی چوڑائی تقریباً ایک میل جبکہ اونچائی 108 میٹر ہے۔
اس آبشار کو ہسپانوی فاتح قابوزا ڈی واکا نے 1541 عیسوی میں دریافت کیا تھا۔ دنیا کے بڑے قدرتی عجائبات میں سے ایک یہ آبشار برازیل اور ارجنٹائن کی سرحد پر موجود ہے۔ یہ آبشاروں کا ایک ایسا نظام ہے جس کی لمبائی، چوڑائی یا حجم تو اتنا زیادہ نہیں ہے البتہ یہ دریائے اگوازو پر موجود 275 آبشاروں کا بڑا مجموعہ ہے۔ ان آبشاروں میں زیادہ تر 64 میٹر سے زائد بلند ہیں۔ ان سب سے میں مشہور “شیطانی حلق” نامی آبشار ہے۔ جو کہ U کی شکل کی ایک ایسی آبشار ہے جو کہ 82 میٹر بلند، 150 میٹر چوڑی اور 700 میٹر لمبی ہے۔
