ڈیلی دھرتی (ویب ڈیسک) بارشوں اور سیلاب کی تباہ کاریاں جاری ہیں،این ڈی ایم اے نے بارشوں اور سیلاب کی تباہ کاریوں سے متعلق تازہ رپورٹ جاری کر دی ہے۔
نیشنل ڈیزاسٹر مینجمنٹ اتھارتی کی جانب سے جاری کردہ رپورٹ کے مطابق ملک بھر میں گزشتہ 24 گھنٹوں میں مزید 57 افراد جاں بحق اور 7 ہزار 683 زخمی ہوئے ہیں۔
رپورٹ کے مطابق سیلاب اور بارشوں کے باعث 14 جون سے اب تک بارشوں اور سیلاب کے باعث ہلاکتوں کی تعداد ایک ہزار 265 ہو چکی ہے، 12 ہزار 577 افراد زخمی ہوئے ہیں۔
بلوچستان میں 257، سندھ میں 470، پنجاب میں 188 اور خیبر پختونخوا میں 285 افراد جاں بحق ہوئِے، بارشوں اور سیلاب کے باعث آزاد کشمیر میں 42، گلگت بلتستان میں 22 افراد جان کی بازی ہار گئے۔
اب تک بارشوں اور سیلاب سے 14 لاکھ 27 ہزار 39 مکانات کو مکمل اور جزوی نقصان پہنچا ہے، ملک بھر میں 7 لاکھ 35 ہزار 584 مویشی مر چکے ہیں۔
این ڈی ایم اے کے مطابق سیلاب اور بارشوں سے بلوچستان میں ایک ہزار 500 کلومیٹر شاہرائیں متاثر ہوئیں اور 18 پلوں کو نقصان پہنچا ہے، سندھ میں 2 ہزار 328 کلومیٹر شاہرائیں اور 60 پل متاثر ہوئے۔
پنجاب میں 130 کلومیٹر، خیبر پختونخوا میں ایک ہزار 589 کلومیٹر، گلگت بلتستان میں 16 کلومیٹر شاہراہیں اور 65 پل سیلاب میں بہہ گئے ہیں۔