ویب ڈیسک
ڈیلی دھرتی (ویب ڈیسک) تفصیلات کے مطابق وفاقی وزیر اطلاعات و نشریات مریم اورنگزیب کا کہنا ہے کہ معاشی بارودی سرنگیں بچھانے والے فارن ایجنٹ آج وزیر خزانہ اسحاق ڈار سے استعفیٰ مانگ رہے ہیں۔
پاکستان تحریک انصاف کے رہنماؤں پر تنقید کرتے ہوئے مریم اورنگزیب نے اپنے ایک بیان میں کہا کہ اپنے ہی کیے آئی ایم ایف معاہدے کو بحال ہوتے دیکھ کر رو کیوں رہے ہیں؟ 9 مئی کو ملک جلایا گیا جبکہ فوجی و نجی املاک پر حملے کیے گئے، شہدا کی یادگاروں کی بے حرمتی کی اور اب معاشی مفاد پر حملے کی پھر تیاری ہے۔
مریم اورنگزیب نے کہا کہ آئی ایم ایف معاہدہ قریب ہونے پر سازشیوں اور ملک دشمنوں کا رونا پیٹنا شروع ہوگیا، پچھلی حکومت نے سخت شرائط پر آئی ایم ایف کا معاہدہ کیا اور خود خلاف ورزی کی، اپنا کیا ہوا معاہدہ توڑا اور پھر ملک اور معاہدے کے خلاف سازشیں بھی کیں۔
انہوں نے کہا کہ معاہدہ ہونے پر چیخنے والوں سے سوال پوچھنا چاہیے معاہدہ کیا کیوں تھا؟ معاہدے کو نہ صرف خود توڑا بلکہ ملک کو ڈیفالٹ کرانے کی سازش کی تھی، نواز شریف معیشت مستحکم کر کے گئے فارن ایجنٹ نے معیشت کی بنیادیں ہلائیں۔
ان کا کہنا تھا کہ نواز شریف واحد لیڈر ہیں جن کی حکومت نے ملک کو ترقی کی راہ پر ڈالا، ’مر جاوں گا لیکن آئی ایم ایف نہیں جاوں گا‘ کون کہتا تھا، پھر وہ آئی ایم ایف کیوں گیا؟
وفاقی وزیر نے کہا کہ عوام کے پیٹ پر مہنگائی کے پتھر باندھنے والے بے شرم اسحاق ڈار سے استعفیٰ مانگ رہے ہیں۔
